Sawa'be / Bohoo'bi

 

         

           Bohoobi, usen neweneen debizhi suangenna.  Newe sogoodu bia waigi seakande.  Dabaido’ain nai’ yeindengahtu, deasen hegi nai dabaishu’ainangwahtu.  Bahain nadategi’pe bai’gaangudugupundee seaka’nde.  Bannaite’nee’ "sawa’be" mai u niha’ka, sosoni’nee’ "bohoobi" mai u niha’ka.  Hagai noom benni dammi nihaka’ngu, "bohoobi" beain newenee baidun tsaande.

 

_________________________________________________________

 

        Beai sudem bohoobi bemma’i neweneen naaka’nna.  Hagaden newe neen na’nna.  Wahaseemoote-manegitemmando’aingandee’, andabi’chinee ma’aishe, newe naninakai’hka.

 

_________________________________________________________

 

        Sosoni’nee uka um bo’ambi’ha dewu’ku nai’i’yu, dease u nambe nai’i’yu, dease u oyo’den nai’i’yu.  U segi’pe bemma hinnan noon dammem bishaa’inna, dease dammi degetsu’wahwaka, daan deka’inna, ude u bai’hai.  Dease benni daa natesu’um baihku, newe sa’pe neetsigwanna ubidaam meekwainde, dease daam bambi neetsigwatun tsaande.  Deasen daa nageya’hakwa’itu tsaande, benni daa hibikwa’hka, dease ainga-aani newe geso’aipehtu.  Dease ohnaa’ bengaba daam bahabinge’inna.  Ramah gahteen (Na’bahoonee) heeku noo seemma bohoobita wigai tsatami’ihkande, u dennua’ ba’i.  Udeen binna (Bayudi’nee) un donziaapeha, u segi’pe ma’ai dahwaani been neka’aindu u neka’oyo’dem ba’i.  Seebateen (Kawailsas) dease um bai’hai wahyanden gahtu bai’diki’ii’yu, been newe nahaka.  Sudeem bohoobitam ba’hai, wihyu wahyandengahyunde gutodo’aikii’yu.  Firecrackers wa’i.

 

_________________________________________________________

 

         Bohoobin deasen, gwahade’nee, huchuu’ neen bemma naaka’nna.  Ideem bemme u ma gwizho’naikandee’: hu’zhaa, sage sparrow dease sage thrasher.  Hu’zhaa’ use bohoobi’mma gwizho’naika’nde.  Oyoon dahwaani, hu’zhaa’nee neka’ai’yu.  Aika bee siai, been nena’pe gahti bia weme’ekiide, u weso’gwaikii’ii’yu, dease been gwa’shi bia’ngu wekesaatsi, um bibiaabe wenai nekagwaindu’i.  Benga udee neka’ainna, "leks," mai naniha’de.  Oyoon dommo, sukuse "lek"-hga bide’idee’.  Um bibiaabe nabishai’ naaka’nde, nokatso’hni nai’i’yu, bohoobin dukai’hgi, u segipe ma’se.   Yebaani, dease dommo sude hu’zhaa suka u segipeha deka’de, sumam gwizho’naihka.  U deka’pe ba’i.

 

_________________________________________________________

 

          Daiboo’nei benni sumbaaduhkangu, sudem bohoobi,a’ke wa’ite.  U Latin-nani’ha "Artemisia", "Artemis" naite, andabi’chi-daibo’neen degai-dai’gwahni’man nanihaade.  Dease binna’gwa, seebatee andapu u niha’nnu, u segi’pehan nabuim ma’ u nihannu.  Ude uka u segi’pehan gazu’nga’htem bahaitee seakande, dawa’nni nabui’ida’dee'.  Sudee wihyu semmai u niha’nnu, "Tridentata", mai’.   Seemoote-manegitemmando’aingendee nannawada’haitee egi situ seaka, Idaho-htu, Utah-tu, Montana-hdu, Nevada-hdu, dease Wyoming-hdu.  Se’semme udee mandee biatsa’tsagide, biaichi’a huupita bi’shiagandee’, gai bee segipeha gwayangendee’.  Sesemme dease ba’i tsatsagidee’, dommo aitu sogope ba’ai neepadi’ihwaindee’.   Tsapaiaishimbiti segipehgandee, na’sumbaa’dum moichi gwanaade.

 

_________________________________________________________

 

          Sude aishimbite u segipe tsaangu miingu’a benni em buika, wai’zhiyi nabuinde u gabai nazakwishikande, u natebihyaagahyu’nde.  U segipehan debihyaande tsaa oha-buhi nabuinde.  Sudee wai’zhiyi nabuinde, use suka bohoobita bemman getaambe, bemma un gwizho’naihka’nna, getaan daa ede’itu, noondea getaan daa ezhe’itu u seaka’ngu. Se’sewe deasen benga u seaka’nna, gai baaga’nde, basapehga sea’aidahka’ndee’, Aiwa’i demase, newen dezo’woi, noondea newen gwasu’u wa’i, saide’hwe behna newe ba’an nepadi’ihka.  Daaza sudee wai’zhiyi nabuinde, aika dabai u’andapu hannihka, deasen dommo u wekenahkande, subai wihyu, gai de’asedu’i.

 

_________________________________________________________

 

          Udem benne ba’an tsatagaidem bohoobi tsaa suku bendum bee seaka’ka sea’de. Dease soose nahammi’ade.  Oyoon dommo, suden dahwaani u segipe mandun geakimi’i’yu, aika damme sogopeha ege yu’waihki’ka, deasem buwa’aishe da sogopeha bamu’ahka’ngu.   Gaishese saika damme sogopeha basaa’gu.  "Dahwaa-segipe" mai nanihade.  Suden dahwaa segipe deche’i bibiasuande, un de’se segipe wagayu’nde.  Dahwaa segipe use bemma suka bohoobita seaka’nna, bemma un gwizho’naihkanna, sunni’yunde sudee bibiasuande.   Bengaaba un dekapeha naakanna.  Use wihyu, saika bengaaba bee seaka’anna getaam basa’kwa’hka, sudee un dahwaa segipeha basa’aidahwatsi, sawehakwainna.  Subai’ wihyu sude bohoobinee’ bemme’sen, daazan getaan dammi daa ede’ingu noo sunniku seaka’ai’yu.

 

_________________________________________________________

 

          No hagai benni dammi nihaka’ngu--sawahbe, big sagebrush, bohoo’bi, noondea Artemisia tridentata, sudem aishimbite saitu hagatu nanna sea’aidahkandee’, siki bengah dammen naaka’ka.  Aibundun dease yeindem baidu.  Noo hagaih getaan dammi daa ezhe’ingu, deasen dammi daa gutsenihka’ngu, getaan dammi daa neai’gu, suden bohoo’bi benishe seaka.  Getaambe su’de, hagani nanna benni daa bidenge’ngu gwizhonaihka.  Wihyu deasen dammi daa baa-magahka, ede’i gwanaade.  Un gwananna aitun nanna damme dugumbanaadu nasumbaadun gwanaade.  Dammi wena’sundawage’nde, aishen benga dammen naaka’nnam benni gwana’nna.