Seme'a yeika maitengaten tsaa hetsa'we'hka.  Gahni gupande bennen tsaa yuwaihka.  Duffy, Dennis ma'ai, deasem behem bia'ma'ai. 

        Udeen nazatewa' mandu dotadaagibiide'ihninananga'nna.  Dennis bopihwatsi, nazatewa' gahtu guhnaikwatsi, u tsate'fa.  U ada'a Dzoon saku we'nne.  Dennis u mo'o mangu u tsanganei', behem bia'wagandu.  U ada' Dzoon udee ma'ai. 

        Dzoon-ham bazi', bozheenan nasaapeha, yuhudegumahanipeha, dease bagwana' ma'aihku u dezaweni'inge'nnu. 

        Duffy, Dennis ma'ain debofoidehwe.  Sude wihyu udehem bia' udehi nikwabinge'hwa.  Dzoon-ham bazi' u debiiyihka, bembai' natesu'ungahni gahyunde un do'aihki'iha.  "Egi dabai'yi, ne daa egezato'aihwai'i," mai'.  Dzoon se'mmai, "Asen natesu'ungahnihga gwabikandee ooyo'nde getaan neetsigwadee'.  "Semme' dainape' ne ma'ai udee hannihka'nna nade'eyangu namadegwaide.  Um bambi neetsikwa, u saape neetsikwa, un gwahain neetsikwa, guto'aihkande, dease naniwichai'yu.  Sukam maanga'ngwa habiide duunammbaideyaipeha manakaihkande, naba'andu weto'ai'nnu.  Neai dease weto'aiwa'i neesungaange'nna.  Ne gaidekawa'i neesunga'.  Dogwai su'afai', uden nurse gwi'yaaa'an nasaapeha yu'nnagi'nna.  Ne deche gwi'yaa'an nasapeha gesungande.  Tsiambeha nasaape, wizha noha unnishua'.  Ne wizha noha'a suka gwi'yaa'an nasaapeha dekahwa, nabai' suka naibi'ta neai magabiidehka.  Use'uka Dzoon tsaan nai'yanei suange'nde. 

        Dease wahatehwe wa'aipe'anehe gahti nemmi nademu'inge'nna.  Semme udehemande bihideyainnu, semme dease basatuku ma gaihaiwa nahannu.  U sowon tsaiH nadekape.  Ne dugu dogwaishen gai suka manakai'yu.  Semme'a dease wa'aipe'an duku deyaito'aipe. 

        Dzoon-ham bazi' u debiiyihka, "Hagai enne neesunga' e'gi?", mai'.  "Ne unnishua neesunga'!", mai Dzoon.  "Ne tsaan gai udeen neetsigwadeen de'oi gai manakai'yu, natesu'ungahni gahyu'nde!", mai Dzoon.  "Nean gwahai nda'ga buwa'ishe aingasaya'we'nna, dease tsaam bihya'kai!", mai'.