Introduction to NEWEN DEBOOPE


A Bilingual Shoshoni-English Newsletter

 

 

        

Siki biadeboohgahni'ga, soon newen nai'yanee', deasen duibichi'anee deboofoidee'. Madeemandee, bemmen newe niwenehtuse niwenedee, seebateen deasem madeegabandeen gai newe niwenedee'. Sideem binna'gwahtee daiboo'dun da'ga niwenedee', noon deasem bemmesen daigwapeha deigu'a nangasumbaadu'idahkandee'.

 

_________________________________________________________

 

   Siki deboofoidee, newenee sika bennai bemmen newe nanaina'kihkanna, si'ahfai'ga nahade, ukuhti dedebiyimbiide. Use sukuhti bemme newe-nahape gahti nihannide, sika (deboopeha) ukuhku nita'oda'nnu, sosoni'dun naboo'di, deasen nadaigwa'di. Seeba siniku sika dammen newe daigwapeha dammi booka'ngu, sidee egena'hnadee', situn dammen daigwapehdun niwenen nahabidegwandu'i.

 

_________________________________________________________

 

      Sidee egi dammen dedehai'dee, dunaa ege deboofoitegi'tsi, daiboo'dun da'ga niwe'nne. Egi wihyu, damme andapungu udei tsa-deboofoingenna, situn dammesen daigwapehtu, dease oyoon dabaiyi dammen niwenehkaniku, gai nageeza seseme' naahku, sidei egena'hnadei tsa-deboofoingemmi'a.

 

_________________________________________________________

 

             Siki biadeboohgahni'gahyunde, sosoni' daigwape madee dammen tsa-deboofoingenna gai namamusu'nde. Hagade noo maka deboofoisuande, maka deboofoidu'i, gai newedu niwenedee, gai newi nangasumbana'indee, noondea baishen sosnoi niwenedee'. Ishe side deboope (newsletter) sukuhyunde do'aihkande. Sideen deboofoideen dammen tsa-deboofoingema'ndese.

 

_________________________________________________________

 

        Seebe, sika deboopeha daigwatsi, dammen nanewenee, sika dammen sosoni' daigwapeha neeko'aidu'ihnee'.