WAAHNI’I,
GWIDAWO’YOM
MA’AI


        Sewe waahni’, dease gwidawo’yonehwe sa’tu yeyengaa’yu.  UdeheN sape gupanden gaihaiwa’i.  Bahogoihka.  Ha’yengenaa sudehwe dodo’aihwa (miwi’ahgwa) baingwi buinnu, baa gahku, ogwaiden gaaba.  Subai waahni, gwidawo’yomma’ai, subai semmai sua’a, deheya’ wizha egi tsaangu de’gakiH.  Seebagia semme’ deheya’, ubidaan na’haneide tsaanden deheya’ bennenndaaga.  Bengahti udehi buika, deheya wihyu gaihaiwa’i.  Gaihaiwa’i sude ubidaande tsaandetsi deheya’ bennenndaagande. Ukuhti udehi buika gaihaiwa’i. 

        Binnagwa dease waahni deasen gwidawo’yom ma’ai mi’mi’a’yu behwe daaga soohoobi gabai’.  Maintengaten getaan duganihka.  Noha’ gai nabuika.  Ba’ande udehe ba’a, soo sohoobite hannihka.  Sabai ede’i b ika’hka, hinni sabai nuyu’handi bika’hka.  Waahni wihyu gwidawo’yom ma’ain de’eyasua’.  Ede’i bikagi’nna, dowoyagaigi’nna. Getaan neaibi’de. Ukuhti neaibidehka, sudehwe daindenga wawazi’hwa.  Nabishai’ binna’gwa buwa’aishem behwe nawain de’eyahka.  Waahni’ deasen gwidawo’yo bozheenai buinnu.  Soondetsi’ bozheenannee mi’a’yu.  Soondee bozheenanee’.  Bibiaichi’neen dease soondeen.  Bozheenanam behe duga’nihkandi nabu’nni.

        Waahni dease gwidawo’yo, baishe egi getaangu bahogoihka.  Bozheena tsaa udehe nai nabunni.  Sudehwe wihyu suka benga behe wawazihkayunde dodo’aihwatsi, suka daindi beataihwatsi, sabundu bozheenanee waga’ndu boboyo’kami’a.  Satu ude baidu mi’mi’a’yu.  Satu miwi’ade, sudehwe, waahni dease gwidawo’yo aaninan gahni buinnu.

        Makahte soondetsi, saidee ‘aningutsi woyoha’ka, dede’aidefeidee’.  Waahni udeen gahni ba’andu bopihwatsi, udeen gahni wemaya’hatai’ku.  Sudehwe getaangu bahogoihka, udehe sa’pe ede’i bikahka.  ‘Aningutsihnei deka’yu.  Sudehwe soongutsi sudei ‘aningutsihnei dekaa’yu.  Sudeen ‘aanniinee suka waahni’a muubin gupai waigwi’nnu, dease um bambi gaabai geakwa.  Sudee aaninnee saitu waahni’an gwashi gahtun nunnudawe’nna. 

        “Aningutsinee saitun i gwidawo’yona nambai ba’ain ge’a.  Dukaigi, gwidawo’yonan ga’sa gabai dease.  Aanni saitun gwida’ wo’yo ba’aigi nunnudawe’nna. 

        Dekamaahwatsi, waahni dease gwidawo’yo saku sonipe ba’an gwa’pi.  Nabishai’ udehi gwabii’gu, udehe sa’pe gupaitem bihya’hgaimbi’de.  Sudehwe yoyodi’tsi, neneka’yu, sunni nanaha’de sudehwe deasen tsaiH gutohgwaihka.  Udehem ba’mbi getaan gutsenihgi’nna.  Baa ogwaiden gahtu guguhnaikwatsi, baa ga sudehwe behem ba’mbi baagwichingenna. 

        Baa ogwaipeidengahti bai sudehwe hipi’H.  Soongo hibikwatsi, dease bitusen gwabi’kwa.  Bangwabiyengatsi.  Udehe sape neetsigwade dugani’hwa.  Binna’gwa beaichehku, aide udehe waganden deyaito’ai, udehe sowo gupaite.